Ortiqcha hujjatsiz, navbatsiz, samara bilan.

“Byurokratiyani bartaraf etish — 2030” dasturi

Davlat xizmati jarayon uchun emas, inson uchun ishlashi kerak

Bu shunchaki mavjud tartiblarni elektron shaklga o‘tkazish emas. Dastur avvalo keraksiz bosqichlarni aniqlaydi va bekor qiladi, jarayonlarni soddalashtiradi, shundan keyingina ularni zamonaviy raqamli yechimlar asosida yangilaydi.

Bir ma’lumotni bir necha bor taqdim etish, turli idoralardan bir xil hujjatlarni yig‘ish, ortiqcha tasdiqlarni kutish yoki oddiy xizmat uchun ko‘p vaqt sarflash — bularning barchasi fuqaro va biznes zimmasiga qo‘shimcha yuk bo‘lib tushadi.

“Byurokratiyani bartaraf etish — 2030” dasturi ana shu muammolarni tizimli ravishda hal etadi. Davlat xizmatlari va ichki ma’muriy jarayonlar to‘liq o‘rganiladi, samarasiz talablar qayta ko‘rib chiqiladi, idoralararo ma’lumot almashinuvi kuchaytiriladi va xizmat ko‘rsatishning yangi, sodda modeli yaratiladi.

Davlat xizmatlari markazida fuqaro xizmatdan foydalanmoqda

Nega bu dastur zarur?

So‘nggi yillarda ko‘plab davlat xizmatlari raqamlashtirildi. Biroq ayrim xizmatlarda eski yondashuvlar va ortiqcha ma’muriy bosqichlar hanuzgacha saqlanib qolmoqda. Dastur muammoni alohida xizmatlar kesimida emas, butun boshqaruv tizimi miqyosida hal qilishga qaratilgan.

Takrorlanuvchi tartib-taomillar

Ortiqcha hujjat va ma’lumot talablari

Ko‘p bosqichli tasdiqlash va kelishuvlar

Qog‘oz shaklidagi jarayonlar

Idoralararo ma’lumot almashinuvining yetarli emasligi

Xizmat ko‘rsatish muddatlarining uzoqligi

Fuqarolar va biznes uchun ortiqcha vaqt va xarajatlar

Dastur nimani o‘zgartiradi?

Ortiqcha talablar bekor qilinadi

Amaliy ahamiyatga ega bo‘lmagan hujjatlar, ma’lumotnomalar, tasdiqlar va takroriy harakatlar bosqichma-bosqich qisqartiriladi.

Jarayonlar soddalashtiriladi

Davlat xizmatining har bir bosqichi qayta ko‘rib chiqilib, fuqaro va biznes uchun eng qisqa hamda tushunarli yo‘l shakllantiriladi.

Xizmatlar to‘liq raqamlashtiriladi

Faqat ariza topshirish emas, xizmatning barcha bosqichlari — ma’lumot almashinuvi, ko‘rib chiqish, qaror qabul qilish va natijani olish jarayonlari raqamli muhitga o‘tkaziladi.

Idoralar o‘zaro bog‘lanadi

Davlat tashkilotlari o‘rtasida ma’lumot almashinuvi kuchaytiriladi. Davlat tizimida mavjud ma’lumotni fuqaro yoki tadbirkordan qayta talab qilish zarurati kamaytiriladi.

Natija o‘lchanadi

Har bir o‘zgarish xizmat muddati, xarajatlar, qulaylik, shaffoflik va amaliy ta’sir bo‘yicha baholanadi.

Dastur kimlar uchun?

Fuqarolar uchun Kamroq hujjat, qisqaroq muddat, tushunarli tartib va davlat xizmatlaridan tezroq foydalanish imkoniyati.

Tadbirkorlar uchun Ma’muriy yuk va xarajatlarning kamayishi, biznesni boshlash va yuritish uchun qulayroq muhit, ortiqcha kelishuvlarning qisqarishi.

Davlat xizmatchilari uchun Takroriy vazifalardan xalos bo‘lish, zamonaviy ish jarayonlari, foydali tashabbuslarni ilgari surish va eng yaxshi yechimlar uchun rag‘bat olish imkoniyati.

Davlat tashkilotlari uchun Ichki jarayonlarni maqbullashtirish, resurslarni tejash, ish samaradorligini oshirish va xizmatlar sifatini aniq ko‘rsatkichlar asosida yaxshilash imkoniyati.

Zero Bureaucracy — o‘zgarishlar uchun yagona raqamli maydon

Byurokratiyani qisqartirish bo‘yicha takliflarni ishlab chiqish, ko‘rib chiqish va amalga oshirilgan ishlar natijadorligini baholash “Zero Bureaucracy” raqamli platformasi orqali tashkil etiladi. Davlat xizmatchilari platforma orqali quyidagi yo‘nalishlarda takliflar yuborishi mumkin.

Ortiqcha bosqich va talablarni qisqartirish

Xizmat ko‘rsatish muddatini kamaytirish

Davlat va foydalanuvchi xarajatlarini tejash

Jarayonlarni avtomatlashtirish

Idoralararo hamkorlikni yaxshilash

Fuqarolar va biznes uchun yangi qulayliklar yaratish

Tashabbusdan tizimli o‘zgarishgacha

01 Jarayonlarni o‘rganish
Davlat tashkilotlaridagi xizmatlar va ichki ma’muriy jarayonlar inventarizatsiya qilinadi. Ortiqcha vaqt, xarajat yoki hujjat talab qilayotgan bosqichlar aniqlanadi.
Inventarizatsiya
02 Taklifni ishlab chiqish
Muammoni bartaraf etish, jarayonni soddalashtirish yoki avtomatlashtirishga qaratilgan yechim “Zero Bureaucracy” platformasi orqali yuboriladi.
Zero Bureaucracy
03 Taklifni baholash
Tashabbusning fuqarolar va biznesga ta’siri, iqtisodiy samarasi, amalga oshirish imkoniyati hamda boshqa tashkilotlarda qo‘llash salohiyati tahlil qilinadi.
Ekspertiza
04 Eng yaxshi yechimlarni joriy etish
Maqbul deb topilgan takliflar tegishli idora, hudud yoki respublika miqyosida amaliyotga tatbiq etiladi.
Joriy etish
05 Natijani o‘lchash va rag‘batlantirish
Joriy etilgan yechimlarning samaradorligi baholanadi. Eng katta amaliy natija bergan tashabbuslar mualliflari moddiy va nomoddiy shaklda rag‘batlantiriladi.
Natija va rag‘bat

Takliflar qanday baholanadi?

Fuqaro va biznes uchun amaliy ta’sir

Taklif xizmatdan foydalanishni qanchalik yengillashtiradi va foydalanuvchiga qanday qulaylik yaratadi?

Vaqt tejamkorligi

Xizmat ko‘rsatish yoki ichki ish jarayoni qancha qisqaradi?

Xarajatlarning kamayishi

Fuqaro, biznes yoki davlat tashkiloti uchun qancha mablag‘ tejaladi?

Amalga oshirish imkoniyati

Taklifni mavjud resurslar, texnologiyalar va huquqiy sharoitlarda hayotga tatbiq etish mumkinmi?

Keng qo‘llash salohiyati

Yechimni boshqa tashkilotlar, hududlar yoki xizmatlarga tatbiq etish mumkinmi?

Eng yaxshi tashabbuslar e’tirof etiladi

Rag‘batlantirish moddiy mukofot, rasmiy e’tirof va kasbiy rivojlanish imkoniyatlarini qamrab olishi mumkin.

3 mln AQSH dollari

Maxsus rag‘batlantirish jamg‘armasi

Amaliyotga tatbiq etilgan eng samarali takliflar mualliflarini qo‘llab-quvvatlash uchun tashkil etiladi.

Quyidagi natijalarga erishgan tashabbuslar alohida e’tirof etiladi.

Davlat budjeti va boshqa mablag‘larning sezilarli tejalishini ta’minlagan

Fuqarolar hayotini yengillashtirgan

Biznes uchun yangi qulaylik yaratgan

Ortiqcha tartib va talablarni bekor qilgan

Samarali raqamli yoki avtomatlashtirilgan yechimni joriy etgan

“Byurokratiyani bartaraf etish” milliy mukofoti

Davlat boshqaruvida eng samarali yechimlarni aniqlash, tashabbuskorlarni qo‘llab-quvvatlash va tashkilotlar o‘rtasida sog‘lom raqobat muhitini shakllantirish maqsadida “Byurokratiyani bartaraf etish” milliy mukofoti har yili o‘tkaziladi.

Mukofot ortiqcha jarayonlarni qisqartirgan, xizmatlar sifatini oshirgan va insonlar hayotida sezilarli ijobiy o‘zgarish yaratgan tashabbuslarni keng targ‘ib qiladi.

Har bir bekor qilingan ortiqcha talab — fuqaroga qaytarilgan vaqt.

Har yili milliy mukofot o‘tkaziladi

5 natija turi alohida e’tirof etiladi

Har bir tashkilot natija uchun mas’ul

Dastur doirasidagi vazifalarning o‘z vaqtida va samarali bajarilishi uchun davlat tashkilotlarining birinchi rahbarlari shaxsan javobgar hisoblanadi. Har yil yakunida amalga oshirilgan ishlarning samaradorligi baholanadi va natijalar e’lon qilinadi. Har bir davlat tashkiloti:

Dastur bo‘yicha mas’ul shaxsni belgilaydi

Xizmatlar va ichki jarayonlar ro‘yxatini shakllantiradi

Ortiqcha talab va bosqichlarni aniqlaydi

Jarayonlarni qayta loyihalashda ishtirok etadi

Idoralararo ma’lumot almashinuvini ta’minlaydi

Belgilangan natijalar bo‘yicha hisobot beradi

Kutilayotgan natijalar

“Byurokratiyani bartaraf etish — 2030” dasturi natijasida:

Davlat xizmatlaridan foydalanish osonlashadi

Xizmat ko‘rsatish muddatlari qisqaradi

Ortiqcha hujjat, talab va kelishuvlar kamayadi

Fuqarolar va tadbirkorlarning vaqt hamda xarajatlari tejaladi

Idoralardagi ichki ma’muriy yuklama pasayadi

Davlat organlari o‘rtasida ma’lumot almashinuvi yaxshilanadi

Budjet va boshqa resurslardan samarali foydalaniladi

Jarayonlarning ochiqligi va shaffofligi oshadi

Suiiste’molchilik xavfi kamayadi

Davlat tashkilotlari o‘rtasida xizmatlar sifatini yaxshilash bo‘yicha ijobiy raqobat shakllanadi

Byurokratiyasiz davlat — qulay hayot va erkin biznes demakdir

Har bir bekor qilingan ortiqcha talab — fuqaroga qaytarilgan vaqt.
Har bir soddalashtirilgan xizmat — biznes uchun yangi imkoniyat.
Har bir samarali raqamli yechim — zamonaviy va ochiq davlat boshqaruvi sari qadam.

“Byurokratiyani bartaraf etish — 2030” davlat xizmatlarini odamlar kundalik hayotida sezadigan aniq o‘zgarishlarga aylantiradi.

Zero Bureaucracy platformasiga o‘tish Dastur haqida batafsil

Ko‘p so‘raladigan savollar

“Byurokratiyani bartaraf etish — 2030” qanday dastur?

Bu davlat boshqaruvidagi ortiqcha tartib-taomillarni qisqartirish, ma’muriy jarayonlarni soddalashtirish va davlat xizmatlarini to‘liq raqamlashtirishga qaratilgan tizimli islohot dasturidir.

Dastur qachondan amalga oshiriladi?

Dastur 2026-yil 1-yanvardan ishga tushiriladi.

Zero Bureaucracy platformasi nima uchun kerak?

Platforma byurokratiyani kamaytirish bo‘yicha takliflarni yuborish va ko‘rib chiqish, ularning amalga oshirilishini muvofiqlashtirish hamda natijadorlikni baholash uchun yagona raqamli maydon hisoblanadi.

Davlat xizmatchilari qanday takliflar yuborishi mumkin?

Ular ortiqcha talablarni bekor qilish, jarayonlarni soddalashtirish, xizmat muddatlari va xarajatlarini qisqartirish, avtomatlashtirish hamda fuqarolar va biznes uchun qulaylik yaratishga qaratilgan takliflarni taqdim etishi mumkin.

Eng yaxshi takliflar qanday qo‘llab-quvvatlanadi?

Amaliyotga joriy etilib, yuqori natija ko‘rsatgan tashabbuslar mualliflari maxsus jamg‘arma doirasida moddiy va nomoddiy rag‘bat, rasmiy e’tirof hamda kasbiy rivojlanish imkoniyatlariga ega bo‘lishi mumkin.

Dastur natijalari qanday baholanadi?

Natijalar fuqarolar va biznes uchun yaratilgan qulaylik, xizmat muddati va xarajatlarning qisqarishi, budjet tejamkorligi, shaffoflik hamda yechimni boshqa tashkilotlarga keng joriy etish imkoniyati asosida baholanadi.