Buxoro viloyatida hududning strategik rivojlanishi, belgilangan maqsad va ko‘rsatkichlarning ijrosini ta’minlash masalalariga bag‘ishlangan uchrashuv bo‘lib o‘tdi.

Unda Buxoro viloyati hokimining birinchi o‘rinbosari Jamshid Sharopov, O‘zbekiston Respublikasi Prezidenti huzuridagi Strategik rivojlanish va islohotlar agentligi direktori o‘rinbosari Tohirjon Safarov, shuningdek, tegishli tashkilotlar vakillari ishtirok etdi.

Muloqotda Buxoro viloyatini ijtimoiy-iqtisodiy jihatdan yanada rivojlantirish, hududning mavjud imkoniyat va salohiyatidan samarali foydalanish, shuningdek, uzoq muddatli istiqbolga mo‘ljallangan strategik vazifalarni belgilash masalalariga alohida e’tibor qaratildi.

Xususan, “O‘zbekiston — 2030” strategiyasida belgilangan maqsad va vazifalarni hudud miqyosida samarali amalga oshirish, strategik ko‘rsatkichlarga to‘laqonli erishish, ularning ijrosini muntazam tahlil qilib borish hamda mavjud muammolarni o‘z vaqtida aniqlab, tegishli choralarni ko‘rish yuzasidan fikr almashildi.

Shuningdek, viloyatni rivojlantirishga qaratilgan strategik hujjatlarni sifatli va puxta ishlab chiqish, ularda hududlarning o‘ziga xos xususiyatlari, mavjud resurslar va rivojlanish imkoniyatlarini inobatga olish muhimligi ta’kidlandi. Belgilangan vazifalarning ijrosini tizimli tashkil etish va natijadorlikni doimiy monitoring qilish masalalari ham muhokama qilindi.

Uchrashuv davomida Strategik rivojlanish va islohotlar agentligi tomonidan ishlab chiqilgan “Geoportal” tizimining imkoniyatlari ham namoyish etildi. Mazkur tizim hududdagi ijtimoiy va kommunal obyektlar, infratuzilma, mavjud resurslar hamda ularga oid ma’lumotlarni yagona platformada jamlash va tizimli aks ettirish imkonini beradi.

“Geoportal”dan samarali foydalanish orqali hududdagi obyektlar va infratuzilma holatini tahlil qilish, mavjud muammolarni aniqlash, rivojlanish jarayonlarini monitoring qilish hamda kelgusidagi loyihalarni rejalashtirishda zamonaviy raqamli yondashuvlardan foydalanish mumkinligi qayd etildi.

Yig‘ilish yakunida muhokama qilingan masalalar yuzasidan tegishli vazifalar belgilab berildi. “O‘zbekiston — 2030” strategiyasi doirasida belgilangan ko‘rsatkichlarga erishish, strategik hujjatlarning ijrosini ta’minlash hamda amalga oshirilayotgan ishlarni doimiy monitoring qilib borish bo‘yicha mas’ullarga aniq topshiriqlar berildi.